تحسين موقعك الإلكترونى على محركات البحث هى التعديلات اللى بتضيفها على موقعك الإلكترونى علشان يظهر فى الصفحات الأولى فى محركات البحث Search Engine واللى من أشهرها هى ( Google – Bing – Yahoo ) , وظهور موقعك فى الصفحات الأولى على محركات البحث بيزود نسبة الضغط على لينك الموقع وزيادة عدد زوار الموقع من الجمهور المستهدف.
يعتبر جوجل من أشهر المواقع ومحركات البحث والأكثر إستخداماً لمعظم متصفحين الإنترنت , وده بيخلى جوجل من افضل الخيارات لتحسين موقعك على محرك بحث جوجل واختبار الكلمات البحثية المناسبة لأسلوب تقييم جوجل للمواقع لترشيحها للظهور فى الصفحات الأولى.
المحتوى اللى بتقدمه على الموقع يعتبر هو العامل الأساسى على تحسين الموقع على محركات البحث , بتقوم محركات البحث بفحص المحتوى وتصنيفة من خلال عدة عوامل منها المعلومة اللى بيقدمها المحتوى والكلمات المستخدمة , بالإضافة لعوامل تانية كتير واللى بتتطلب منك تعديلات علشان تساعد محركات البحث لترشيح موقعك وظهوره فى الصفحات الأوى , ومن ضمن العوامل ده هى الكلمات البحثية.
تعتبر الكلمات البحثية والكلمات اللى ليها صلة بيها من أهم العوامل اللى بتساعد على تحسين محركات البحث وده اللى بيخلى معرفة انواع الكلمات البحثية وكيفية البحث عنها وإستخدامها والأدوات المستخدمة لإختيار كلمات البحث لتحقيق أفضل النتائج من الخطوات المهمة لظهور موقعك فى الصفحات الأولى على محركات البحث.
أهمية الكلمات البحثية.
البداية دائماً تكون من الكلمات البحثية , أختيار الكلمات البحثية المناسبة هى اللى من خلالها جوجل بتقدر تعرف موقعك عبارة عن ايه والموضوعات اللى بتتكلم عنها , وتقدر ترشح الموقع لمستخدمين الأنترنت اللى بيبحثوا عن نفس الموضوعات , وده بعد ما بتجرى عليه بعض الفحوصات والإختبارات , ومن خلال خوارزمية تقدر تدى تقييم للصفحة اللى كل ما يكون تقييم مرتفع يخلى موقعك يظهر فى الصفحات الأولى , يعنى ده اول وسيله للتعارف بين موقعك وبين محركات البحث.
تحديد هدفك وهدف العميل.
معرفة العميل المحتمل اللى بيستهدفه موقعك ومواصفات الجمهور المستهدف لزيارة الموقع واشتراكهم فى الخدمة أو شراء المنتج من العوامل اللى هتساعدك وانت بتحدد الكلمات البحثية واللغة المناسبة اللى هتتكلم بيها فى الموقع , بالإضافة للتركيز على الصفحة الرئيسية المطلوب توجيه زوار الموقع ليها لانها بتكون الهدف الاساسى من الخطة التسويقية واللى من خلالها بتعرف جمهورك ايه هى الخطوة التاليه سواء شراء منتج او الإشتراك فى خدمة او تسجيل بيانات وغيرها كتير.
تعتبر العملية ده عملية مستمرة على الموقع وبتتكرر مع كل مقاله بتنشرها على موقعك , بتحدد الجمهورة المستهدف والهدف من النشر والخطوة التاليه للجمهور المستهدف اللى هيزور الصفحة.
كلمات بحث رئيسية ( Generic Keywords ).
الكلمات البحثية الرئيسية بتكون عبارة عن كلمة أو كلمتين بتوضح موضوع الصفحة وطبيعة البزنس إذا كان نشر علامة تجارية او تسويق لخدمة أو منتج أو محتوى تعليمى .
كلمات بحث طويلة ( Long tail Keywords ).
هى أضافة كلمات على الكلمات البحثية الرئيسية وبتوصل من 3 إلى 5 كلمات وممكن تزيد لأكتر من كده وبتضيف تفاصيل وتحديد أكتر للموضوع , وده بيساعد على انتقاء أفضل للفئة المستهدفة ده غير تقليل حجم المواقع المنافسة على نفس الكلمات البحثية .
لو كان موقعك عبارة عن تقديم محتوى عن التسويق الإلكترونى , هتكون كلمة البحث الرئيسية هى ( التسويق الإلكترونى ) , وفى الحالة ده نتائج البحث هتكون كتيرة جداً وحجم المنافسة عالى وهيتضمن مواقع كبيرة وعملاقة .
لكن لما نضيف كلمات على الكلمة البحثية الرئيسة ( اتعلم التسويق الإلكترونى وإبدء مشروع على الإنترنت من غير خبرة سابقة ) , بالشكل ده الكلمات البحثية بقت اكثر وضوح وتفصيل عن المضمون وفى نفس الوقت هتقلل حجم المنافسة ده غير ان اللى هيستخدم الكلمات ده شخص محدد وعارف هو عايز ايه , يعنى انتقاء أفضل للعملاء المحتملين .
كلمات بحثية لوصف خدمة أو منتج.
بتستخدم الكلمات البحثية بهدف ترقية ونشر خدمة أو منتج وفى الحالة ده بيكون أفضل إختيار للكلمات البحثية هى وصف الخدمة أو المنتج , يعنى لو الخدمة اللى بتقدمها كورس تسويق إلكترونى يبقى الكلمات البحثية هى كورس تسويق إلكترونى .
تحديد الموقع فى الكلمات البحثية.
لو الخدمة أو المنتج اللى بتقدمه ليه مكان ثابت حقيقى مش بس على الإنترنت فى الحالة ده من الأحسن إنك تضيف أسم البلد أو المدينة فى الكلمات البحثية يعنى مثلاً ( كورس تسويق إلكترونى فى القاهرة ) , لأن ده هيساعد اللى بيدور على الخدمة فى نفس البلد أو المدينه إنه يلاقى اللى بيدور عليه.
المنافسين.
تحليل ودراسة المواقع المنافسة بإستخدام الأدوات المتاحة على الإنترنت واللى بتقدم تقرير عن الموقع من حيث عدد الزوار والكلمات البحثية المستخدمة وبيانات تانيه كتير , هيساعدك انك تختار الكلمات البحثية اللى إستخدمها المواقع المنافسة واللى بتقدم نفس الخدمة وتحديث الكلمات البحثية بإضافة كلمات لتكون محدده أكثر , وده بعد تحليل الموقع من حيث أمكانية منافسته لضمان ان موقعك يكون مرشح للظهور فى الصفحة الأولى فى محركات البحث , يعنى لو فى موقع صغير أو متوسط وظهر فى الصفحة الأولى على محرك البحث بيكون أفضل أختيار لتحليله ومنافسته.
يعتبر المحتوى القيم والهادف هو أهم العوامل , فإذا لو كان الموقع المتواجد فى الصفحة الأولى بيقدم محتوى قيم هتكون منافسته صعبة , لكن لو كان المحتوى اللى بتقدمه بيضيف قيمة عن المحتوى المتواجد فى الصفحة الأولى هتكون منافسته اسهل .
إستخدام الكلمات البحثية فى السياق.
لما بيقوم محرك البحث بفحص موقعك علشان يعرف ايه هو المحتوى اللى بتقدمه ويرشحه لمستخدم الإنترنت اللى بيبحث على نفس الموضوع وزى ما عرفنا ان الكلمات البحثية من أهم العوامل اللى بيعرف بيها محرك البحث الموضوع والمحتوى المنشور على الموقع , ولا يكتفى محرك البحث انه يحدد الكلمات المستخدمة فى العنوان فقط لكن بيدور عليها أو على مرادفاتها فى سياق المقال أو المنشور الموجود على الموقع ده بالإضافة لوجودها فى وصف الصور Alt tag وعنوان صفحة الويب URL ووصف الصفحة Meta Description .
الأماكن اللى تستخدم فيها الكلمات البحثية :
- العنوان الرئيسى Head Title
- عنوان صفحة الويب URL
- وصف الصورة Alt tag
- وصف صفحة الويب Meta Description
تحسين الموقع لمحركات البحث يعتبر من القنوات التسويقية المهمة اللى هتساعد على إنتشار موقعك والوصول إلى أكبر عدد من عملاءك المحتملين وتحقيق الهدف التسويقى سواء إنتشار علامة تجارية أو زيادة عدد زوار الموقع وزيادة نسبة المبيعات للمنتج أو الخدمة اللى بتقدمها من خلال موقعك.
