صناعة المحتوى علشان يحقق الهدف منه بيعتمد على نقطتين أساسيتين وهما جودة وقيمة المحتوى ومعدل النشر , يعنى يبقى المحتوى له قيمة وبجودة عالية وفى نفس الوقت معدل نشر كبير.
وده علشان يتحقق هيحتاج منك خبرة فى المجال اللى بتتكلم عنه أو موضوع المحتوى والحاجة التانية هى المهارة اللى هتحتاجها فى إنتاجه زى مهارة الكتابة أو التصميم أو إنتاج الفيديو , بس سواء الخبرة أو المهارة هتكتسبها مع الوقت , وكل ما هتنشر محتوى أكتر كل ما هتتعلم أسرع .
المطلوب منك إنك تبدأ , إبحث وأكتب وصمم وإخرج وأنشر محتوى ومع الوقت هتنبهر بالنتيجة , أنا بس هديلك شوية نصائح هتساعدك إنك تنتج وتنشر أكتر علشان تحقق هدفك.
ركز فى أسلوب واحد
بيختلف شكل وصيغة المحتوى , يعنى ممكن يكون كتابة مقالات على مدونة أو فيديوهات أو مدونات صوتية أو صور ومنشورات على مواقع التواصل الإجتماعى , وعلشان تبدأ إختار الأسهل والأفضل بالنسبة ليك وركز عليه , وغالباً بيكون كتابة المقالات Blog Post.
القيمة ومعدل النشر
زى ما القيمة اللى بتقدمها من خلال المحتوى مهمة , إلا إن معدل النشر مهم جداً , لأنك كل ما هتنشر أكتر كل ما هتتعلم أسرع وهتوصل لجمهورك وتقرب من هدفك.
أشهر صناع المحتوى على الإنترنت عدى عليهم أوقات بينشرو فيه محتوى مقبول , وإنت متعرفش بين كل اللى بتنشره إيه اللى هيحققلك أعلى تأثير وأفضل نتيجة.
قاعدة 20/80
قاعدة 20/80 ده قاعدة مشهورة فى البزنس وفى التسويق والمبيعات , والمقصود بيها إن 20 % من خطة التسويق بتحقق 80 % من المبيعات , وقيس عليها أى حاجة تانية , يعنى 20% من اللى بتنشره هيحققلك 80% من التفاعل والمتابعة ,
دوس شير
حط خطة نشر يومية وإلتزم بيها ودوس شير , يعنى لو بتكتب مقالات , إكتب مقالة كل يوم , ولو بتنتج فيديو سجل فيديو وإنشره كل يوم , انشر كل يوم محتوى مفيد وليه قيمة وبلاش سيلفى اللاتيه.
إعادة توجيه المحتوى
بعد ما ركزت على قناة أو صيغة واحدة وبالفعل حطيت خطة يومية للنشر تيجى خطوة إعادة توجيه المحتوى أو تحويل المحتوى وهى إنك تعمل شوية تعديلات بسيطة فى صيغة المحتوى وتعيد توجيهه ونشره فى قنوات مختلفة , هقولك أمثله بناءً على الصيغة الأساسية اللى إخترتها
كتابة المقالات
- تحويل المقالة أو جزء منها أو الملخص بتاعها لفيديو قصير وتنشره على اليوتيوب.
- نشر صورة ومعاها سطرين من المقال على مواقع التواصل الإجتماعى.
- نشر الفيديو القصير على مواقع التواصل الإجتماعى اللى بتدعم نشر الفيديو.
- حول المقالة لتسجيل صوتى وإنشره على مواقع التدوين الصوتى Podcast.
نشر فيديو على اليوتيوب
- إعادة نشر الفيديو أو جزء منه على مواقع التواصل الإجتماعى اللى بتدعم نشر الفيديو.
- كتابة السيناريو أو الإسكريبت ونشره كمقالة على المدونة أو الموقع.
- خد سكرين شوت من الفيديو ومعاها كلمتين من السيناريو وانشرها على مواقع التواصل الإجتماعى.
- حول الفيديو لتسجيل صوتى وإنشره على مواقع التدوين الصوتى .
متنشاش وإنت بتعمل تحويل أو إعادة توجيه المحتوى إنك تسيب لينك Link لقناتك الرئيسية سواء كانت موقعك أو المدونة , أو قناة اليوتيوب , أو صفحتك وحسابك على مواقع التواصل الإجتماعى
بالطريقة ده تقدر تزود معدل النشر من خلال صياغة محتوى واحد وتعديل حاجات بسيطه اللى تناسب كل منصة وإعادة النشر .
نستنتج من ده كلمة السر فى النجاح وهى الإستمرارية , كتير من اللى منجحوش فى تسويق المحتوى لإنهم توقفو عن النشر بعد شهر , وعلشان تبدأ تحس بالنجاح وتجنى ثمار تعبك هتحتاج إنك تستمر فى النشر لمدة 90 يوم , وهتتفاجئ بالنتيجة.
النتائج المتوقعة من الإستمرار فى النشر
- تكوين قاعدة محترمة من المنشورات على مختلف المنصات.
- تكوين قاعدة من المتابعين.
- تنمية مهارتك فى صياغة المحتوى وتقرب من الإحترافية.
- زيادة خبرتك فى المجال اللى ببتكلم عنه من خلال البحث والتعلم المستمر.
