التسويق الإلكترونى أو التسويق الرقمى هو من إسمه المقصود بيه التسويق على الإنترنت , وهو ميفرقش كتير عن التسويق التقليدى فى الهدف والمفاهيم الأساسية , وهى وصول وإنتشار البزنس سواء كان خدمة او منتج او معرفة لأكبر عدد من العملاء المحتملين والمهتمين, ولكن يختلف التسويق الإلكترونى فى أسلوب وطريقة المخاطبة والعرض وسلوك ورد فعل العميل.
متتطلبات العمل فى مجال التسويق الإلكترونى
- العمل الجاد
- الصبر والإستمرارية
- الممارسة
- الرغبة فى البحث والتعلم المستمر
أنماط التسويق الإلكترونى
المقصود بيها هى الصيغة اللى بتوصل بيها رسالتك للعميل , وده ليها أكتر من شكل أو طريقة منها :
- المدونات وتحسين محركات البحث. Blogs – SEO ( Search Engine Optimization )
- التسويق بالبريد الإلكترونى. E-Mail Marketing
- التسويق على مواقع التواصل الإجتماعى. SMM ( Social Media Marketing )
- القنوات الإذاعية أو التدوين الصوتى. PodCast
- صناعة الفيديو وتسويق اليوتيوب. Video Marketing
- الإعلانات الممولة. Advertising ( Paid Ads )
من الممكن الجمع والخلط بين أكثر من نوع لكن من الأفضل إستخدام كل طريقة منفصلة علشان تقدر تحلل النتائج وتحدد النمط اللى يحقق أكبر تأثير ويحقق أكثر فاعلية.
الهدف الرئيسى من خلال كل الأنماط المختلفة هى جذب الزوار لأى مصدر من مصادر التسويق المستخدمة , يعنى زيادة عدد زوار الموقع أو قناة اليوتيوب أو صفحات وحسابات مواقع التواصل الإجتماعى أو زيادة قائمة البريد الإكترونى , علشان أقدر أحوله لأرباح أو زيادة مبيعات أو حتى نشر علامة تجارية.
- الإعلانات ( Advertise )
- برامج الأفيلييت ( Affiliate Program )
- دروب شيبينج ( Drop shipping )
- بيع منتج رقمى ( Digital Product )
- تقديم خدمة مدفوعة ( تقليدية – إلكترونية )
كل ده علشان يتم بطريقة إحترافية ويحقق الهدف المطلوب منه لازم يكون فى خطة أو إستراتيجية تسويقية مبنية على بحث ودراسة وتحليل , وهنا هقولك على المراحل الإساسية لبناء خطة تسويقية تناسب أى نشاط أو بزنس .
- تحديد الفئة المستهدفة.
- الوصول إلى الفئة المستهدفة.
- صناعة المحتوى / الإعلان وإختبار A/B.
- بناء علاقة إيجابية مع الجمهور.
تحديد هوية الفئة المستهدفة ( Target Audience )
الخطوة الأولى من خطوات عمل خطة أو إستراتيجية تسويقية هى معرفة الفئة المستهدفة يعنى لازم تكون عارف إنت بتكلم مين , ومش من الضرورى إن البيانات تكون دقيقة فى البداية إنما بيتم تعديلها طبقاً لتوفر أى بيانات جديدة وده من خلال تحليل مؤشرات الأداء .
من خلال البيانات ده بتعمل بطاقة أو كارت هوية للفئة اللى انت بتخاطبها , حاجة زى الكارنية كده مكتوب عليها البيانات وبتكون قدامك بإستمرار , يعنى مثلاً ممكن تطبعها وتعلقها جنب شاشة الكمبيوتر أو فى المكان اللى انت بتشتغل فيه..
إنشاء بطاقة هوية ( Buyer Persona ) هتوضح فيها البيانات الأساسية عن الفئة المستهدفة
- السن ( مراحل سنية مختلفة )
- النوع ( ذكر / أنثى )
- الوظيفة ( يعمل / لايعمل / دوام كامل / عمل حر / رائد أعمال ….. )
- المكان ( الدولة / المدينة )
- الإهتمامات
تحديد الهوية هى العامل الأساسى لبناء الخطة التسويقية , لأنها بتساعد على تحديد النمط وصيغة المحتوى المناسبة اللى هتوصل بيه رسالتك للعملاء المستهدفين.
الوصول للفئات المستهدفة
بعد ما حددت الفئة المستهدفة من خلال إنشاء بطاقة الهوية تيجى خطوة إزاى تحدد صيغة المحتوى اللى تقدر توصل بيها رسالتك , مثلاً لو الفئة المستهدفة يناسبها قراءة المقالات تبقى أنسب طريقة هى إنشاء مدونة , أو لو بتتفرج على فيديوهات يبقى الطريقة هى قناة على اليوتيوب .
حتى وسائل التواصل الإجتماعى بتحدد إيه أنسب منصة , يعنى الإنستجرام غير الفيسبوك غير بينترست غير التيك توك وكل طريقة فيهم بتتحدد حسب بيانات الفئة المستهدفة وصيغة المحتوى اللى هتقدمه من حيث حجم المعلومات والوقت اللى بيحتاجه كل نمط فى إنشاءه.
- مقالات – موقع إلكترونى
- فيديو – قناة على اليوتيوب
- مواقع التواصل الإجتماعى – صفحة على الفيسبوك أو حساب على الإنستجرام
ممكن إستخدام أكتر من صيغة والدمج بينهم , وبالتجربة وتحليل المؤشرات تقدر تستنتج الطريقة الأكثر فاعلية وليها تأثير ونتائج أفضل واللى هتحتاج تركز عليها.
صناعة المحتوى / الإعلان
فى طريقتين للوصول للفئة المستهدفة لتحقيق الهدف من الخطة التسويقة وهما المحتوى والإعلانات .
صناعة المحتوى
المحتوى هو عبارة عن معلومات قيمة ومفيدة عن موضوع متعلق بالخدمة أو المنتج اللى بتقدمه , وزى ما قلنا ممكن يكون مقاله أوصورة أو تسجيل صوتى أو حتى رسائل قصيرة , وبتكون مجانيه وبلا مقابل.
فى البداية بتكون صناعة المحتوى صعبة وبتاخد وقت طويل لكن كلمة السر فيها هى كل ما بتصيغ محتوى أكثر كل ما بيكون أسهل وأسرع وأفضل , يعنى هتحتاج نقطتين مهمين علشان تبدأ ( البداية – الإستمرارية ).
رغم إن الطريقة ده بتاخد وقت طويل ومجهود كبير لحد ما تجنى ثمارها , إلا إنها مازالت ليها التأثير الإيجابى والفعال لأى بزنس , وفيها ميزة كمان وهى إن إنشاءها بيكون مجانى , يعنى كل اللى عليك انك تكتب وتسجل وتنشر مادام عارف انت بتقدم إيه وبتقدمه لمين.
الإعلانات
الطريقة ده بتحتاج مبلغ وميزانية للإعلانات ومش لازم تكون ميزانية كبيرة , ومع إستمرار تحليل نتائج الإعلانات الممولة , وده للوصول لأكبر عدد من العملاء المحتملين للخدمة أو المنتج اللى بتقدمها , وإجراء التعديلات الضرورية لتحقيق الهدف التسويقى .
إستخدام مبدأ رئيسى من مبادئ التسويق وهو إختبارات ( A/B ) وده المقصود بيه نشر نموذجين من الإعلان بعد تغيير بعض العناصر وقياس النتائج ومؤشرات كل نموذج , ومعظم المنصات بتوفر الخدمة ده بطريقة سهلة فى التنفيذ وتحليل النتائج.
بناء علاقة مع الجمهور
الوصول لأعداد كبيرة من المهتمين والمتابعين والعملاء المحتملين هى البداية وبعد كده مطوب الإحتفاظ بالإعداد ده , زى إعادة زيارة الموقع أو إعادة شراء الخدمة أو المنتج وده مش هيحصل إلا لو فى علاقة ثقة بينك وبين جمهورك.
إسمع بإهتمام
أهتم بردود أفعال جمهورك وبتقييماتهم لأن ده غير إنه بيعمل على بناء الثقة إلا إنه مصدر قيم جدا لمعلومات مهمة ومجانية علشان تطور من الخدمة أو المنتج اللى بتقدمه.
خليك كريم
خليك كريم وسخى دايماً بإنك تقدم محتوى قيم ومفيد مجانى وخلى نسبتك فى البيع 1 : 4 يعنى كل مرة بتحاول تبيع فيها قصادها 4 مرات تقدم قيمة مجانية.
جمهورك رقم واحد
عامل النجاج الرئيسى فى نجاح مشروعك أو خطتك التسويقية هى الجمهور والمتابعين بعنى خليك دايماً بتفكر انك تقدم اللى يلبى إحتياجتهم وبالطريقة اللى تناسبهم.
الثقة اللى بتبنيها بينك وبين جمهورك هى نتيجة شغل ومجهود ووقت ولو خسرتها بيكون صعب إستعادتها مرة تانية فحافظ عليها.
